ચ્યુઇંગ ગમ ચાવવાની કુટેવથી ટીનેજરો થઈ શકે છે માથાનો ભયંકર દુખાવો

તેલઅવીવ, 22 ડિસેમ્બર

દરેક માતા-પિતાએ એ જાણવું જરૂરી છે કે તેમનાં બાળકો ચ્યુઇંગ ગમ તો વધુ પ્રમાણમાં નથી લઈ રહ્યાંને અને તેને પોતાની ટેવ તો નથી બનાવી લીધીને. ઇઝરાયલના શહેર તેલઅવીવમાં આવેલા મેઇર મેડિકલ સેન્ટરના નાથાન વેટમબર્ગે આ બાબતે એક અભ્યાસ કર્યો હતો. નાથાન પાસે ક્રોનિક માઇગ્રેનના કારણે માથાના દુખાવાની સમસ્યાઓ લઈને આવતા દર્દીઓ જ્યારે ચ્યુઇંગ ગમ છોડી દેતા ત્યારે તેમની સમસ્યાઓ દૂર થઈ જતી હતી.

આ મામલે ડોક્ટર નાથાને જણાવ્યું હતું કે, 'ક્રોનિક માઇગ્રેનના કુલ ૩૦ દર્દીઓમાંથી ૨૬ દર્દીઓમાં ચ્યુઇંગ ગમ ખાવાની ટેવ છોડ્યા બાદ સુધારો જણાયો હતો જ્યારે ૧૯ જણાને સંપૂર્ણપણે આ સમસ્યામાંથી છુટકારો મળ્યો હતો.'

આ તારણોની ખરાઈ કરવા જ્યારે ૨૬ દર્દીઓએ ફરીથી ચ્યુઇંગ ગમનો ઉપયોગ બે સપ્તાહ માટે શરૂ કર્યો તો તેઓએ અમુક જ દિવસોમાં જ માથાના દુખાવાની ફરિયાદ કરી હતી. ચ્યુઇંગ ગમમાં ટીએમજે નામનું દ્રવ્ય જોવા મળે છે જેને કારણે માથામાં દુખાવો થઈ શકે છે.