વાંચો! હવે વિટામિન સી વડે ટીબીની સારવાર થશે

વોશિંગ્ટન, 23 મે

એન્ટિબાયોટિક્સ નિષ્ફળ થઈ જાય છે ટીબીના તેવા પ્રકારમાં વિટામિન સી કારગત

વૈજ્ઞાનિકોએ એવો દાવો કર્યો છે કે, વિટામિન સી વડે ટીબીના એક એવા પ્રકારની સારવાર કરી શકાય છે જેની ઉપર અમુક શક્તિશાળી દવાઓ પણ કામ નથી કરી રહી. યેશિવા યુનિર્વિસટીના અમેરિકી શોધકર્તાઓએ પોતાના એક રિપોર્ટમાં કહ્યું કે, ચકિત કરી દેનારી આ શોધ ટીબીનાં સંક્રમણનો સામનો કરવા માટે ઘણી કારગત સાબિત થઈ છે. મલ્ટિડ્રગ રેજિસ્ટન્ટ ટીબી' નામનું આ સંક્રમણ એક એવી અવસ્થા છે જેની શરૃઆતના તબક્કામાં અમુક પાવરફુલ દવાઓ પણ નિષ્ફળ જાય છે.

પારંપારિક એન્ટિબાયોટિક્સ પણ નિષ્ફળ

એક અનુમાનને આધારે આખી દુનિયામાં લગભગ સાડા છ લાખ લોકો આવા પ્રકારનાં ટીબીના દર્દીઓ છે અને આટલા મોટા આંકડાને જોતાં વૈજ્ઞાનિકો માટે હવે આ અધ્યયન વધારે જરૃરી બન્યું છે. પ્રયોગશાળામાં કરવામાં આવેલાં અધ્યયનને આધારે એક તથ્ય સામે આવ્યું છે કે, વિટામિન સી શરીરમાં રહેલાં અમુક એવાં તત્વોનું ઉત્પાદન કરવામાં સક્રિયતા કેળવે છે જે ટીબીને ખતમ કરે છે અને આ તત્વોને ફ્રી રેડિકલ્સનાં નામથી ઓળખવામાં આવે છે અને આ તત્ત્વો જ્યાં એન્ટિબાયોટિક્સ પણ નિષ્ફળ થઈ જાય છે, ટીબીના તેવા પ્રકારમાં પણ તે કારગત સાબિત થાય છે.

શોધની શક્યતાઓ

આ શોધની આગેવાની કરી રહેલા ડોક્ટર વિલિયમ્સ જણાવે છે કે, અમારી આ શોધનો પ્રયોગ અમે એક ટેસ્ટટયૂબ પર કર્યો છે અને અમને તેમાં સફળતા મળી છે પરંતુ અમને તે ખબર નથી કે માણસો પર અને જાનવરો ઉપર પણ આ કારગત સાબિત થશે કે નહિ. આ બાબત અંગે વિચાર કરવા માટે અમે એક મહત્ત્વપૂર્ણ અધ્યયન કર્યું હતું, કેમ કે, અમારી પાસે આવા પ્રકારનાં ટીબીનો નમૂનો છે અને તેને કાબૂમાં લેવા માટે અમારી પાસે કોઈ દવા નહોતી. પ્રયોગશાળામાં અમે જોયું હતું કે ટીબીના આ નમૂનાને વિટામિન સી અસરહીન કરી દે છે. આ સિવાય વિટામિન સી સસ્તું છે, સરળતાથી ઉપલબ્ધ પણ છે અને તેનો ઉપયોગ કરવો સુરક્ષિત પણ છે.